Nùgoro, Museu de sa tzeràmica - ISRE

Su museu de sa tzeràmica de Nùgoro custoit e avalorat una colletzione de prus de 300 cantos originales chi indagant sa produtzione populare e artìstica de sos manufatos tzeràmicos de su Primu Noighentos a su Pustisgherra.
Su museu, ammaniadu movende de sas colletziones giai possedidas dae s'Istitutu superiore regionale etnogràficu, s'est posca arrichidu de lassas e achirimentos bènnidos de sos tzentros de produtzione territoriales comente a su Campidanu e s'iscola de Durgali, finas a sas testimonias de sos mastros sardos printzipales, chi si sunt distintos in sa chirca subra de su campu de s'artesania artìstica: Francesco Ciusa, Salvatore Fancello, sos frades Melis, Edina Altara e in su segundu Noighentos Emilia Palomba, Gavino Tilocca, Angelo Sciannella.
S'espositzione est collocada in sos ispàtzios de Casa Chironi a Nùgoro, restaurada in tempos reghentes e torrada a sa comunidade in custa beste de museos noa.
S'allestimentu de su museu, puntu de riferimentu pro sos apassionados de tzeràmica, est istadu curadu dae s'Architetu Antonello Cuccu, siat pro sos istudiosos chi pro totus cussos chi disìgiant iscobèrrere s'arte e s'istòria de custa traditzione millenària.

Ca est importante a lu bisitare
Su percursu de bìsita a su museu s'isnodat intre sos ambientes de Casa Chironi, elegante cuntestu architetònicu, chi donat un'atmosfera ùnica e coinvolgente a s'esperièntzia de bìsita, carrende in manera ideale sos visitadores in sas fases istòricas in cales sa tzeràmica at pigadu vida, creschende e trasformende·si in su cursu de su tempus.